إنتاج المحتوى - كيف مقطعك ينَّجِم الملخص. كذاب ابن كذاب الي بيضمن لك تنجيم شهرة انتشار مقطع من مقاطعك (چوينچ ڤايرال يعني). قبيلة. كيف الحال؟ بتعرفي صاحبتك الي بتسأليها عن أحسن حلاق و بتروح بتدلك على حلاقها الي بتربطها فيه علاقة عاطفية كلامية غزلية حبية و القصة مافيها ولا حبة شغل او مضمون و سوسن بدها بس تجيب شغل لسمير الي متجوز و عنه دزينة أولاد و هو أصلًا ما بيعرف مين سوسن. هي هيك العلاقة مع المحتوى. اذا ضيعتي خليني اشرح. المناسب إِلي قد لايكون مناسب لك. و ما اريده من الحلاق المحل المطبخ المطعم المحتوى الكتاب الفيديو الاغنية قد يختلف عن تذوقكك و ما تريدين. أنا بتحمس على كتاب محتواه بيحكي عن الالعاب النفسية الي البشر بيلعبوها بين بعض و يشارك هذا الكتاب مع كل اصدقائي الحلوين. و قبيلتي الحلوين. و عيلتي الحلوين. برأيك المحلل المالي حسام رح يتفاعل مع محتوى الكتاب متلي ؟ ممكن. طيب سعاد الي غرامها بالحياة السفر؟ آهااااا هيك وصلنا لتنجيم و شهرة المحتوى. جميل. شو هو المحتوى الي بيناسب الكل و الكل بيحبه و رح يجيب المشاهدات و الملايين و هدول الشغلات. الجواب هو ولا شي بيناسب الكل و بيوصل للكل و الكل رح يشوفه أو يحكي عنه. و أيضًا الجواب هو كل شي ممكن يناسب الكل و يوصل للكل و الكل رح يشوفه و يحكي عنه. العملات الرقمية لما حكينا عنها بال ٢٠١٥ كانوا العالم يفكروك مجنون. هلا ستك بتتصل فيك و بتقلك شو أخبار البتكوين و الايثيريوم و السولانا. موضة الاهتمامات دائمة التغير و الي بيلاحق الموضة بيتعب. بيتعب جدًا. فلاحق الي انت بتحبه و اخلص العمل فيه. اخلص الانتاج فيه. كون أفضل واحد في مجالك و اترك الباقي للزمن. اليوم محتوى عن قطة بتأكل ايسكريم و بترقص مع صاحبها ممكن يصير حديث الساعة. و بعد خمس دقائق ممكن ينتشر فيديو لعلماء نفس عم يحكو عن الوسواس القهري. ما رح تكون الي عم تترقص قبل دقيقتين و بعدين تطلع انت العالم تبع النظريات النفسية العميقة الي بتزلزل فقاعة فرويد. فركز. هلا هناك بعض الخطوط العريضة جدًا جدًا جدًا و القواسم المشركة لتنجيم و شهرة المحتوى أهمها بساطة المنتج النهائي حتى لو كان معقد التفاصيل. يعني محتوى طبي يتحدث عن السرطان و الدكتور الي عم يشرح لعامة الشعب مستخدم صور و چرافيكس توضيحية و فيديوهات و غيرها و غيراتها من المواد الداعمة لتوصيل فكرة ليش التدخين مربوط بسرطان الرئة. أو ليش أكل الخضراوات الورقية الخضراء الغامقة أكثر فائدة من الخس مثلًا. من الخطوط العريضة كمان خفة الدم. مش ضروري التنكيت و الضحك من الدان للدان. وهاي كمان بتفرق بين سوسن و سعاد. ممكن تشوفو خفيف دم و شربات والتانية بتشوفو ديزل