إنتاج المحتوى - لغة السوشيال الملخص. الناس بدها "انت" الحقيقي بلغتك الحقيقية. ولكوو ملينا من الكذب الاعلامي الاعلاني المتصنع. بلغة عربية فصيحة قبيلة. كيف الحال؟ اسعد الله اوقاتكم اعزائي المشاهدين. و مع زقزقة العصافير و اشراقة يوم جديد… بس خلص يطيك العافية اختنقت. و للتنين ثلاثة الي ما سكروا المقطع احييكم و وصلت الفكرة اعتقد. لغة التلفزيون و الاذاعة لا تتناسب مع لغة السوشيال ميديا و شكرًا. خلصت. واضحة و صريحة و مباشرة لازم تعرف ان سيكولوجيا التواصل الاجتماعي غير. هو تواصل "اجتماعي" يعني بشري يعني كيف تكون قاعد انت و صحابك و فاتحين مواضيع و عم تحكوا عن انشطار الذرة أو مباراة أو آخر كتاب قرأته. أكيد عمر مارح بقلك ماهي الحالة الشعورية التي كان مارق فيها الكاتب و علل و أعرب ما تحته خط. خلص طلعنا من هالجو. كل ما كنت قريب من متابعينك باللغة الي بيفهموها كل ما كنت صديق إلكتروني صدوق و بيحبوك عالفيسبوك و بيسمعوك أكثر و بتصير مؤثر أكثر. فاختيار المصطلحات المستخدمة في محتويات التواصل الاجتماعي جدًا مهمة. حسان انا دكتورة و لغتنا جافة جدًا. بقلك تمام. لو جمهورك دكاترة احكو بالجينوم لبكرا الصبح. بس لو جمهورك عامة الناس خلينا نحكي عن مجموعة الجينات المكونة للانسان. وكمان مش رح تروحي النار اذا قلتي انسان بدل هوموسيبيان و محدا رح يعاتبك و الله. بسط ترحب بكم. و اذا لزم الامر لاستخدام مصطلحات معقدة و مافي مفر. عطيني مرادف او تنين حتى تقرب الفكرة او الكلمة أكثر. البرامج المتخصصة و المحتوى المتخصص مش معمول لكافة الناس. أنا مافيني افتح كتاب طب سنة ثالثة و اقول هالكاتب معقد و متفلسف كتير. شو هالحكي انا مش فاهم و الحق على الي كتب. لا يا حبيب عمتك سماهر. لازم تدرس سنة اولى عشان توصل للغة سنة ثالثة و هكذا. عنا في العالم العربي بنوقع في دوامة اللهجات كثير. المصري في الغالب مفهوم أكثر و أوسع بسبب ريادة مصر في انتاج المحتوى منذ عشرات السنين. الاغاني و الافلام و المسلسلات و الكتب و الاذاعة و التلفزيون. كلها ساهمت في نقل اللغة و الثقافة المصرية لبقية متحدثي اللغة العربية. بس اقلك الحتة بتاعتي بتعرف شو يعني. بس لما اذكر الحومة بيسخن راسك. بلاد الشام لحقت مصر إنتاجيًا و ثقافيًا. و بقية البلاد العربية زاد الاهتمام فيها لانتاج المحتوى. و صار المتابع يستوعب مجموعة اوسع من اللهجات. بس بتضل اللهجة البيضة هي سيدة اللهجات عربيا لبساطتها و قربها من الجميع. اذا محتواك مش وطني فالنصيحة انك تحكي بلغة بيضة محايدة يسهل فهمها للكل. تمام ؟ و لليوم سلام. --- Send in a voice message: https://anchor.fm/hassanalsheikh/message