"لغة الأديغة-"كلمات الحياة-Adyghe(адыгэбзэ)"Words of Life".3gp // ИУАН 1 ГущыӀэр цӀыфы зэрэхъугъэр 1УблапӀэм дэжь ГущыӀэр щыӀагъ. Ар Тхьэм дэжь щыӀагъ, а ГущыӀэри Тхьэр арыгъэ. 2УблапӀэм щегъэжьагъэу а ГущыӀэр Тхьэм дэжь щыӀагъ. 3Тхьэм а ГущыӀэм зэкӀэри къыригъэгъэхъугъ. Тхьэм къыгъэхъугъэ пстэумэ ащыщэу а ГущыӀэм къыримыгъэгъэхъугъэ зи щыӀэп. 4МыкӀодыжьын щыӀэныгъэ а ГущыӀэм хэлъыгъ, а щыӀэныгъэри цӀыфхэм нэфынэ афэхъугъ. 5Нэфынэр шӀункӀым щэнэфы, шӀункӀыри нэфынэм текӀуагъэп. 6Тхьэм къыгъэкӀуагъэу, лӀы горэ дунаим къытехьагъ. Ащ ыцӀагъэр Иуан. 7ЦӀыф пстэуми а нэфынэмкӀэ шӀошъхъуныгъэ яӀэ хъуным пае, Иуан нэфынэм шыхьат фэхъунэу къэкӀуагъ. 8Ежьырэп нэфынагъэр, ау нэфынэм шыхьат фэхъунэу Тхьэм ар къыгъэкӀуагъ. 9Нэфынэ шъыпкъэу цӀыф пстэури къэзгъэнэфырэр дунаим къытехьанэу щытыгъ. 10А ГущыӀэр дунаим къытехьагъ. Тхьэм а ГущыӀэм дунаир зэкӀэ къыригъэгъэхъугъ, ау щытми дунаим ицӀыфхэм ар къашӀэжьыгъэп. 11Ежь ихэгъэгу къэкӀуагъ, ау ицӀыфхэм ежь аштагъэп. 12Ау ежь зэкӀэ зыштэгъэ цӀыфхэу ежьыркӀэ шӀошъхъуныгъэ зиӀэхэр Тхьэм ибын хъунхэу фитыныгъэ аритыгъ. 13Ахэр Тхьэм ибын зэрэхъугъэ шӀыкӀэр сабый къызэрыхъурэ шӀыкӀэм фэдэп. Ащ къикӀырэр ахэр Тхьэм ибын зэрэхъугъэхэр хъулъфыгъэ бзылъфыгъэм зэрехъуапсэрэм фэдэп, е лӀы горэ лъфыгъэ зэрэфаем фэдэп, ау Тхьэм бын фэхъуныр къызхэкӀыгъэр Тхьэр ары. 14А ГущыӀэр цӀыфы хъугъэ ыкӀи къытхэтыгъ, шӀугъэрэ, гукӀэгъурэ, шъыпкъагъэрэ хэлъэу. Ежь ищытхъушхоу Ты лъапӀэм ы Къо закъо ищытхъушхуи ары. НэшӀу щыфэныгъэрэ шъыпкъэрэ ежь ыгу илъыгъэх.