「潮」是潮流的潮，「文」是網絡文章的文，只要夠爆、夠頂癮、夠貼地、夠好笑，任何文章都可以是潮文。 生活那麼苦，「潮文共賞」由謝遜聲音導航，望為諸位添上一點甜，絕對有益身心健康﹗ 番外篇第20話﹕一乾三濕 點解食雲吞撈會送碗湯 特別嗚謝：高登會員三聯幫牟中三 ⬇️ 原文 ⬇️ 話說當年有高登仔問點解食雲吞撈會送碗湯， 當時無無聊聊嘅我忍唔住留咗個言： 「呢個係舊時廣東人嘅傳統 以前啲麵店講嘅係「一乾三濕」 即係麵、湯、茶、汁 四樣 無論你食雲吞麵 雲吞撈麵 都一定要上齊呢四樣 如果你食撈麵 最正宗最傳統嘅食法應該係先飲茶漱口 之後加醬油落兜湯度 食幾啖麵 含一啖湯 一嘢噴落個小二身上 「Hi! 咁難食點食呀! 」 咁個店家就知你係行家 會打番個7折比你」 少不更事嘅我無估到高登威力咁大，直到後來我認真想搵個起源， Hi Auntie搵嚟搵去都係搵返呢篇勁嘢，連OPEN RICE都有人用「一乾三濕」呢個Term， 我真係好後悔，兜出公海竟然中返自己伏， 所以我決定認真去搵返呢個起源出嚟。 我嚴選咗兩間香港都幾出名嘅雲吞麵店，膽粗粗食完麵問吓鋪頭啲人， 第一間喺深水埗，當我問完呢個問題後，阿姐不耐煩地望咗我一眼， 「咁你係咪唔飲呀？」佢一手已經拎住我碗湯， 「唔係，我想問點解會有呢碗湯啫。」 「撈麵咪有囉！」阿姐大大聲答我， 「咁點解撈麵會有碗湯嘅？有冇咩歷史典故咁架？」 阿姐靜默幾秒，好似望住個精神病人咁呆望住我， 「咁你係咪唔飲呀？」佢又拎住我碗湯， 就係咁，我無謂同阿姐無限Loop落去，俾錢就走佬。 第二間喺元朗，聽講仲好老字號，果然裡面裝修都好似回到七十年代， 麵店入面啲師傅真係一睇就知係新界原居民， 通常阿叔特別多嘢講，仲懶係連張枱都吹到啲典故， 於是我走埋去，深吸一口氣， 「唔好意思，我想問呢，點解食撈麵一定會送碗湯嘅？」 個阿叔抬起頭望我，頸上條金鏈仲粗過我條皮帶， 「撈麵乾，咪俾湯你濕濕個嘴囉！」 「咁呢個整法有冇話咩典故，或者幾時開始有呢個傳統？」 「我八歲開始跟我阿叔整麵，咁多年都係咁架啦！」阿叔開始有啲唔耐煩， 「係咪潮州麵先會有呢個傳統？」我死纏佢唔放， 阿叔望住我，個樣有少少燥底， 「你去食茶記、食西餐夠有杯茶俾你啦，你唔問吓佢有咩典故？！」 我一呆，心諗阿叔又有啲道理， 之後我就俾個阿叔趕走咗。 連問兩個麵店都係咁嘅結果，我開始懷疑，呢個根本就係一個傻的嗎問題， Hi，人地口乾咪問人攞碗湯囉！邊嚟咁多故仔呀！ 一諗到自己又Seven咗，我就有啲唔開心， 行行吓我又行入咗間雲吞麵店，我雙目無神地點咗個雲吞撈粗， MK造型嘅店小二扔咗碟麵俾我，我茫然地望住兜麵， 我睇唔透，究竟呢兜純粹係一兜普通麵，定係一兜有情有義有血有肉嘅絕世好麵， 「究竟……….撈麵呢碗湯係點嚟嘅……」我自言自語， MK仔聞言望向我，然後露出一個笑容， 「你係今日第三個問我呢個問題。」MK仔突然有種莫測高深嘅感覺， 「願聞其詳！」我興奮地說， 「嗱，呢個係舊時廣東人嘅傳統，以前d面店講嘅係「一乾三濕」…………」 APPLE ● SPOTIFY ● YOUTUBE 每月首週三晚九點登場。 ---------- 【SOCIAL MEDIA。讚好謝遜】 ✅ https://linktr.ee/jessontalker 【TREEHOLE。投稿樹洞】 🌲 https://forms.gle/Tt2NN6pdVncpZWAJ9 【SUPPORT ME。感謝支持】 💰 http://payme.hsbc/jessontalker 💰 http://paypal.me/jessontalker