នៅ​យប់​ថ្ងៃ​សៅរ៍ ទី២៦ ឆ្លង​ចូល​ថ្ងៃ​អាទិត្យ ទី២៧ តុលា​នេះ ទូរទស្សន៍​អាមេរិកាំង CNN និង ABC បាន​ផ្សព្វផ្សាយ​ព័ត៌មាន​ជុំវិញ​ការ​ស្លាប់​ជា​យថាហេតុ​ប្រមុខ​អង្គការ​រដ្ឋអ៊ីស្លាម​ឈ្មោះ អាប៊ូ បា អាល់ បាដាឌី​នៅ​ក្នុង​ប្រតិបត្តិការ​កងកម្ម៉ង់ដូ​អាមេរិកាំង​ក្នុង​ប្រទេស​ស៊ីរី។ ព័ត៌មាន​មួយ​នេះ​នៅ​មិន​ទាន់​មាន​ការ​បញ្ជាក់​ជា​ផ្លូវការ​ពី​ក្រសួង​ការពារជាតិ​អាមេរិក​នៅ​ឡើយ​ទេ។ តែ​អ្នកនាំពាក្យ​នៅ​សេតវិមាន​បាន​ប្រកាស​ឲ្យ​ដឹង​ថា ប្រធានាធិបតី​អាមេរិក​លោក​ដូណាល់ ត្រាំ​ធ្វើ​សេចក្តីថ្លែងការណ៍​មួយ​យ៉ាង​សំខាន់​នៅ​ម៉ោង ៩ព្រឹក ម៉ោង​នៅ​អាមេរិក​នា​ថ្ងៃ​អាទិត្យ ទី២៧ តុលា។ ការ​ប្រកាស​របស់​អ្នកនាំពាក្យ​សេតវិមាន​យ៉ាង​ដូច្នេះ​បាន​ធ្វើ​ឡើង បន្ទាប់​ពី​លោក​ត្រាំ​បាន​សរសេរ​នៅ​ក្នុង​ទំព័រ​បណ្តាញសង្គម Twitter របស់​លោក​ថា « មាន​ហេតុការណ៍​ដ៏​ធំ​មួយ​ទើប​កើត​មាន​ឡើង »។