កាល​ពី​ថ្ងៃ​សុក្រ ទី៦ ធ្នូ ទាហាន​អារ៉ាប៊ីសាអូឌីត​ម្នាក់​ដែល​កំពុង​ហ្វឹកហ្វឺន​នៅ​មូលដ្ឋាន​ទ័ពអាកាសនាវាចរណ៍​អាមេរិក​ឈ្មោះ Pensacola ក្នុង​រដ្ឋ Florida បាន​បាញ់រះ​នៅ​ក្នុង​បន្ទប់​ហ្វឹកហ្វឺន​ដោយ​បណ្តាល​ស្លាប់​មនុស្ស ៣នាក់ និង​របួស ៨នាក់។ ខណៈ​នេះ ភាគី​អារ៉ាប៊ីសាអូឌីត និង​អាមេរិក​កំពុង​បើក​ការ​ស៊ើបអង្កេត​ដើម្បី​ស្វែង​យល់ និង​ស្វែង​រក​ការ​ពិត។ គួរ​រម្លឹក​ថា អាមេរិក និង​អារ៉ាប៊ីសាអូឌីត​ជា​សម្ព័នមិត្ត​ចាក់​ទឹកមិន​លេច។ តែ​ចង់ ឬ​មិន​ចង់ ព្រឹត្តិការណ៍​មួយ​នេះ​អាច​ធ្វើ​ឲ្យ​រដ្ឋបាល​អាមេរិក​ពិចារណា​ឡើង​វិញ​លើ​កម្មវិធី​ហ្វឹកហ្វឺន​ទាហាន​បរទេស និយាយ​ជា​រួម និង​ទាហាន​អារ៉ាប៊ីសាអូឌីត និយាយ​ដោយឡែក។