الفيلم اللي منحب نكره. يعني قد ما هو الفيلم حلو قد ما منكره عشان التزييف الامريكان للتاريخ عشان يبيضوا تاريخهم. وتوم كروز... قد ما منكره قد ما أفلامه حلوة. يعني من الآخر، حلقة مفصومة!

الفيلم اللي ثبت إيدي مورفي كنجم كبير بهوليوود ومن أكثر الأفلام مضحكين. قبل ما يكون في واكاندا، كان في زاموندا

هذا الفيلم كان آخر فرصة حقيقية لبراد بيت انه يفوز جائزة أوسكار... بس الشاطرين أعطوها لواحد ثاني ولا حدا بعرف مين هو. لأنه هذا الفيلم يمكن يكون من أجمل الأفلام الرياضية بالقرن الحالي وكسر التركيبة اللي كل الأفلام الرياضية مبنية عليها.

أجمل فيلم حرب بتاريخ السينما وأفضل عمل للمخرج سبيلبيرغ في مسيرته.

فيلم من التسعينات بطريقة قوية، من النص لطريقة الاخراج وحتى التمثيل. الفيلم فرق وسام وعلي عن آرائهم عن الفيلم، فإنتو شو رأيكم؟

مش دايماً ممثلين الكوميدي بنجحوا بعملان أفلام درامية، بس لم تزبط معهم... عن جد بتزبط معهم! فيلم من بطولة ويل فاريل اللي أعطانا أداء ولا أجمل بفيلم غريب وعجيب وحلو.

من أجمل الأفلام من خارج هوليوود عن أكثر الشخصيات شعبية. القصة الواقعية عن رحلت تشي جيفارا في أرجاء القارة الأمريكية الجنوبية وكيف هذا المشوار غير من تفكيره وعمله القائد الشيوعي اللي كلنا منعرفه.

اليوم رح نحكي عن أحلى فيلم بالعالم... بدون مبالغة! أكثر فيلم كان له بصمة على أفلام التسعينات وما بعده، وتحفة فنية من إخراج وكتبة نص وتمثيل وحتى مزيكا. هل كوينتينو تارانتينو عمل فيلم أحلى منه؟

ما في حدا بقدر يعمل فيلم بهل حجم ومستوى الانتاج والآداء مثل المخرج العبقري كريستوفر نولان. قصة غريبة ونسيج من الأفكار معقد بس بطلع من الفيلم وانت مبسوط ومبهور(ة) الى أقصى الحدود.

بدنا نرجع بالزمن شوي ونرجع نحكي عن فيلم من أجمل الأفلام عند وسام وعلي. قصة ونص وأداء ممثلين وطبعاً إخراج سبايك لي... كل إشي كان مثالي وفيلم لازم ينحضر كثير عشان نقدر نقدروا.

فيلم من أوائل أفلام المخرج دُنيه فيلنوف وفايت بعالم عربي وهمي بس كل اشي فيه واقعي. حرب لبنان على سها بشارة على كثير قصص وحكايات. وسام تعب وهو بحضره فشوي شوي وانتو عم بتسمعوا

من أروع الأفلام بتاريخ السينما ومن أعمقهم كمان. يعني مش كل في آكشن بكون الآكشن فيه كل اشي...

وسام بحكي انه فيلم كثير عادي، وعلي بقول انه من أحلى الأفلام بتاريخ السينما المعاصرة. مع مين انتو؟؟

نادر كثير انه تلاقوا فيلم كوميدي/آكشن بهل مستوى من الإخراج والكتابة، بس هذا الفيلم أتقن هدول الشغلتين بطريقة رهيبة.

حبينا نرجع بالوقت ونعيد نشر حلقة من الحلقات المفضلة عند المستمعين عن فيلم يعتبر غير كثير شغلات بعالم أفلام الأكشن، أعطانا أحسن نسخة من بروس ويليس.

الفيلم الثالث من الثنائي توم هانكس وستيفن سبيلبرغ، وفيلم غير عن كل أفلام المخرج المخضرم... ويمكن تكون أكبر عملية غسيل أموال بتاريخ هوليوود. طلع مش قليل هل سبيلبرغ.

قمة في الأداء والجمال والفن والإبداع و... كل اشي! المخرج مايكل مان والفنانين آل باتشينو وروبرت دي نيرو أعطونا، ما يقال، انه احلى فيلم بالعالم. رائعة التسعينات وأفلام الآكشن على مر العصور.

يمكن وسام وعلي ما يتفقوا اذا هاد من أحلى أفلام آخر عشرين سنة، بس أكيد متفقين انه تحفة فنية ويستاهل منحضر من الأول

منعرف انه طولنا الغيبة عنكم فحبينا نعمل هل مقطع القصير نشرح بشو احنا مشغولين ونشارككم الحالية والمستقبلية.

في أفلام تبلعب خدع علينا: بكون الفيلم حاضرينه زمان وكيفيين عليه، بس لم نيجي نحضره مرة ثانية بعد سنين وسنين، بطلف فيلم بالمرة وما بنحضر! هذه هي خدعة النوستالجيا، وهاي هي الخدعة اللي صارت فينا بهل فيلم. طلعوا ميل جيبسون وجوليا روبرتس ضحكانين علينا!!!

في مراجعتنا الشهرية للأفلام الجديدة، دخلنا بهاي الحلقة بعالم غوثام سيتي المظلم جداً والفيلم الجديد لباتمان اللي فعلاً فاجئنا بجماله من كل النواحي: تمثيل وإخراج وقصة. تنويه مهم: ضروري تحضروا الفيلم قبل سماع الحلقة، إلا إذا مش فارقة معكم (بهل حالة وضعكم صعب والله يعينكم على حالكم).

من أهم أفلام القرن الجاري ويمكن يكون أهمهم. الانهيار الاقتصادي بسنة ٢٠٠٨ غير كثير شغلات لكثير ناس... الا الجماعة اللي سببوه. فيلم بخليك تشد شعرك من القهر والقرف، بس بنفس الوقت بيعطيكم وقفة تقدير للأداء العظيم من المخرج والكاتب والممثلين.

توم كروز، قبل ما يكون رجل الآكشن والطاخ والطيخ، كان ممثل جدي كثير بالتسعينات وكان يلعب أدوار فعلاً بتفرجي قدراته التثيلية، مثل هذا الفيلم. واحد من أحلى أفلام الكوميديا الرومنسية ومن الأفلام اللي صعب الواحد يزهق منهم. 

معروف عن ول سميث انه ممثل غير شجاع - يعني بس بلعب الأدوار اللي هو مرتاح فيها ومش كثير بطلع من دائرة الراحة تبعته. فلم ياخذ هذا الدور الناس كلها رح تنتبه، وفعلاً كان أداء جميل جداً من سميث ويمكن أجمل دور له على مر مسيرته.