佛教擁有好多各具特色嘅學派，其中，有一個學派總會引起眾人注意，佢對經典唔太著重，有住令人一聽就會皺起眉頭嘅公案，會嘲笑佛陀、三句唔埋兩句就要用棍打弟子——聽到呢度，相信答案已經呼之欲出，佢就係，禪宗。 點解禪宗睇落咁奇怪，當學者、僧人談論禪宗嘅時候，會咁津津有味呢？講白啲，就係點解咁騎呢嘅做法，居然無畀時代淘汰呢？ 咁我哋就可以睇下喺現代將禪宗發揚光大、傳遍歐亞嘅禪師——鈴木大拙所寫嘅禪宗入門書，《鈴木大拙禪學入門》。呢本書喺西方世界有頗大影響，喺博客來嘅內容簡介更寫到： 「心理學大師榮格讚譽：『本書是西方世界最有影響力的禪學書籍。』　　 哲學家海德格讚嘆：『這就是我所有著作中想表達的事情。』」 要知道點解鈴木大拙會喺西方世界引嚟咁大迴響，睇佢生平就可以略知一二。 鈴木大拙，出生於1870年，大拙係佢嘅法號，本名係貞太朗。佢喺大學主修英文，青年時期主要從事將佛經、中國經典翻譯成英文嘅工作，二十七歲首次到美國，然後多次喺歐美各地演講、教學。到中年嘅時候，喺佢寫出一部佛教史《大乘佛教概論》之後，開始受到西方學界注意，除咗因為佢思想獨特，仲因為佢嘅作品大部分都係以英文書寫，又適逢歐洲經歷一戰、二戰嘅巨大創傷，急需新思想嘅修復，鈴木大拙嘅作品就順水推舟，成為西方人領略東方思想嘅階梯。 當中，「垮掉的一代」（Beat Generation）嘅傑克・凱魯亞克（Jack Kerouac）、埃爾文・艾倫・堅士堡（Irwin Allen Ginsberg）都係禪宗愛好者，不時手握住鈴木大拙嘅作品；「垮掉的一代」仲影響住後嚟嘅嬉皮文化……總之，鈴木大拙嘅作品喺西方獨有嘅社會氣氛之下，將禪宗推廣。鈴木大拙更被譽為「世界禪者」，喺1963年被提名諾貝爾和平獎。 你唔好以為佢係禪者就無學術地位，佢曾經做過東京帝國大學講師、大谷大學教授、美國哥倫比亞大學客座教授……今時今日西方人理解禪呢個概念嘅時候，亦因為鈴木大拙嘅影響力，而將禪翻譯成日文發音嘅Zen，而非普通話發音嘅Chán。呢點都有一個同胡適有關嘅故仔可以講。我哋正文再講。 今集內容包括： 「鈴木大拙與胡適」：鈴木大拙同胡適本來互相敬重，但係由於對研究禪嘅取態唔同，筆戰不斷。我哋會講講禪宗喺五祖之後嘅南宗北宗之爭，喺呢場爭鬥當中，出現咗家傳戶蹺嘅佛偈，「本來無一物，何處惹塵埃。」 放喺《牛哥講經》嘅〈禪學入門〉原本只有兩集，即係兩篇文稿，喺錄第一篇文稿嘅中途，發現太長，所以分開兩次嚟錄，所以依家成個〈禪學入門〉將會分成三集，而頭兩集係分享同一篇稿。今次錄音只會講述第一部分「鈴木大拙與胡適」，其餘部分，就下次再講埋。