2022年1月24，徛佇台北國賓戲院影廳內底，葉佳龍看著銀幕的「諸葛四郎」，目屎含目墘。1點鐘閣28分鐘的電影頭一改放影煞鼓，片尾字幕出現──「獻予我的老爸佮老母」，煞落來是長長的片尾名單，有出名的電影人，有參與募資的一般民眾。超過一千个名一一走過眼前，彼是成就這齣電影的每一个希望，想著遮，葉佳龍目屎滴落來。電影製作的這段時間，伊總是按呢，目屎含目墘、忍咧、攑頭，閣微微仔笑。