2024年初，臺灣選出第16任總統佮第11屆立法委員，1,900外萬選民用選票共全世界展現臺灣的民主成果，就算講是一場公開透明順利的選舉，但是並無代表實踐百分之百的公平佮正義。臺灣是多元族群的社會，佇咱的土地有濟濟無仝款文化背景的人，佇這馬的政治制度之下，欲用選票來表達𪜶的心聲真困難，甚至𪜶根本是選舉的局外人(kio̍k-guā-lâng)。