Ғизои солим барои ҳама зарур, он асоси саломатӣ аст, аммо барои зани ҳомила аҳамияти дучанд дорад. Чунки истеъмоли ғизо натанҳо барои организми зани ҳомила муҳим, балки ба инкишофи тифли дар батнаш буда низ таъсиррасон аст. Дар нашри якуми силсилаи нави подкастҳои “Модари солим, кӯдаки солим” Раъногул Ҳусейнова, педиатр ва мутахассис оид ба ғизо дар бораи таъсири ғизои солим ба зани ҳомила ва ширдеҳ, аҳамияти кӯмаку дастгирӣ ёфтани модари ҷавон дар давраи ширдиҳӣ гуфт. Раъногул Ҳусейнова қайд кард, ки сар карда аз рӯзҳои аввали ҳомиладорӣ, ҳатто вақте зани ҳомила аз он огоҳ нест, дар ҳамин давра аллакай пайдошавӣ ё ташаккули узвҳои ҷанин оғоз мегардад ва ғизои зан маҳз аз ҳамин лаҳзаҳо хеле муҳим аст. “Дар се моҳи аввали ҳомиладорӣ ташаккули узвҳо дар ҷанин ҷараён мегирад ва махсусан лӯлаи асаб, ки дар 27-28 рӯзи аввал аллакай инкишоф меёбад. Дар ин давра хатари пайдо шудани нуқсонҳо хеле зиёд аст. Барои он ки тифл дар ҳамин давра ба нуқсонҳои модарзодӣ гирифтор нашавад, пурра инкишоф ёбад ва солим ба дунё ояд, ҳатман зарур аст туршии (кислотаи) фолат ва оҳан”,- афзуд мутахассис. Ӯ гуфт, туршии фолат ба гурӯҳи витаминҳои B9 дохил мешавад ва барои пешгирӣ кардани нуқсонҳои модарзодӣ, махсусан дар лӯлаи асаб, кушода мондани сутунмуҳра, ҳалқаи ноф ва инкишоф наёфтани мағзи сар нақши муҳим дорад. “Туршии фолатро аз маҳсулоти гуногун пайдо кардан мумкин. Ин модда дар таркиби ҳамаи сабзавоте, ки барги сабз доранд ва қобили истеъмол ҳастанд, вуҷуд дорад. Яъне дастрасӣ ба он қариб ягон мушкил надорад, вале бояд дар истифодааш меъёрро бояд риоя кард. Инчунин, истисно ҳангоми мавҷуд будани оризаҳое, ки ҷаббиши туршии фолатро дар организми зани ҳомила ё кӯдаки батнаш кам мекунанд”,- шарҳ дод педиатр. Ба гуфтаи мутахассис, давраҳое ҳастанд, ки организми зани ҳомила ва кӯдаки дар батнаш буда ба туршии фолат бештар ниёз пайдо мекунанд ва дар ин вақт беҳтар аст аз ҳабҳо (таблеткаҳо)-и туршии фолат истеъмол шавад. Ҳатто чанд ҳафта пеш аз ҳомила шудан зан бояд туршии фолатро дар организми худ зиёд кунад, зеро он моддаи дар об ҳалшаванда аст ва зуд аз байн меравад. “Барои инкишофи кӯдак ғайр аз туршии фолат, дигар минералҳо, аз қабили оҳан, калсий, магний ва ғайра заруранд, ки о