មហាសន្និបាតអន្តរជាតិនៃបណ្តាគណបក្សនយោបាយនៅអាស៊ី (ICAPP) បានចាប់ផ្តើមជាផ្លូវការនៅទីក្រុងភ្នំពេញ។ កិច្ចប្រជុំ ICAPP លើកទី១២នេះ បានធ្វើឡើងក្រោមប្រធានបទ «ការស្វែងរកសន្តិភាព និងការផ្សះផ្សា»។ ក្នុងនាមជាប្រធានគណបក្សប្រជាជនកម្ពុជា លោក ហ៊ុន សែន បានថ្លែងបើកមហាសន្និបាតជាមួយនឹងបទពិសោធន៍របស់កម្ពុជាដែលធ្លាប់ឆ្លងកាត់សង្រ្គាម មុននឹងទទួលបានសន្តិភាពដូចពេលនេះ។ បើតាមលោក ហ៊ុន សែន ការផ្សះផ្សាជាតិជាមូលដ្ឋានគ្រឹះ ដើម្បីឈានទៅបញ្ចប់សង្រ្គាមនិងភាពវឹកវរក្នុងប្រទេសមួយ។ តែយ៉ាងណា អ្នកនយោបាយក្រៅរដ្ឋាភិបាល យល់ថា សន្តិភាពកម្ពុជានៅមិនទាន់ពេញលេញ ព្រោះតែបញ្ហាបែកបាក់នយោបាយផ្ទៃក្នុង។