بحب المشي في الجناين، الملمس الرطب في الكعب والصوابع، والريحة الحلوة اللي بتدخل في الجسم طاقة مختلفة، مكنتش محظوظة كفاية أن يبقى عندي جنينة لحد دلوقتي، بس بحاول في أي مساحة متاحة أضيف حاجة من الطبيعة.. على حرف الشباك، في ركنة شمس أو في البلكونة، ولما اضطريت أقعد في البيت أكتر بسبب «كورونا»، المساحات الصغيرة ديه بقت ملاذي أنا وأسرتي. من هنا اتولدت فكرة سلسلة البودكاست «حكاوي جنايني هاوي» من إنتاج «مدى مصر». كل حلقة بتقدم قصة شخص مش خبير، بس عنده شغف حقيقي ناحية الزرع، وبيشاركنا تجربته الخاصة، فيه اللي بيتكلم عن الزراعة والمطبخ، وفيه اللي بتتكلم عن علاقة الموسيقى بالنباتات، وفي كل مرة بنتعرف برضو على نصايح تساعدنا إحنا كمان نزرع. معانا النهاردة إبراهيم جارسيا، معماري مصري/كوبي/أمريكي مقيم بالقاهرة، إبراهيم مهتم بالطبيعة والنباتات من صغره واشتغل لفترة في ملجأ لحماية الحيوانات المهددة في أرجنتينا. لما درس عمارة اتخصص في مجالات العمارة البيئية والحضرية، حلمه أنه يأسس مزرعة بتتبع فلسفة الزراعة الدائمة (permaculture) وإلى أن يحقق حلمه بيحاول يطبق المبادئ دي على النباتات اللي بيزرعها في البيت وفي شغله. «حكاوي جنايني هاوي» بودكاست من إنتاج «مدى مصر» فكرة وإعداد وحوار ومونتاج: مي الوكيل مكساج صوت: سمير نبيل - ستوديو بدروم موسيقى: شادي الجرف