Description
ការមានអារម្មណ៍ថា ព្រះជាម្ចាស់នៅឆ្ងាយពីយើង គឺជាអារម្មណ៍មួយដែលគ្រីស្ទបរិស័ទជាច្រើនធ្លាប់មាន។ ពេលខ្លះយើងមានអារម្មណ៍ថា ទ្រង់នៅឆ្ងាយពីយើងណាស់។ ការនេះធ្វើឲ្យយើងគិតថា ទ្រង់ហាក់បីដូចជាកំពុងពួនពីយើងអញ្ចឹង ឬក៏ថា ទ្រង់មិនបានសម្ដែងព្រះវត្តមានដ៏រស់រវើករបស់ទ្រង់ឲ្យយើងឃើញសោះ។ លោកអ្នកមានការបាក់ទឹកចិត្ត ហួតហែង ហើយអស់សង្ឃឹម ព្រោះលោកអ្នកមិនប្រាកដថា តើទ្រង់នៅក្បែរលោកអ្នក នៅព្រះសណ្ដាប់ ឬក៏នៅបន្តយកចិត្តទុកដាក់នឹងលោកអ្នកទៀតឬក៏អត់។ ដោយគិតដូច្នេះ លោកអ្នកហាក់បីដូចជាអស់កម្លាំង មិនមានចិត្ដចង់អធិស្ឋាន ព្រោះក្ដីអធិស្ឋានរបស់លោកអ្នកហាក់បីដូចជាគ្មានន័យអីសោះ គ្មានខ្លឹមសារ ហើយលើសពីនោះ លោកអ្នកក៏មានអារម្មណ៍ដែរថា ក្ដីអធិស្ឋានរបស់លោកអ្នកត្រឡប់មកលោកអ្នកវិញដោយការខកចិត្ដ ពេញដោយភាពបរាជ័យ។