La «Marella» contextualisescha il cas da las Senioras per il clima e da lur plant cunter la Confederaziun.  Dapi il cumenzament d'avrigl rapportan medias da l'entir mund da las Senioras per il clima ch'èn idas davant il Tribunal europeic dals dretgs umans a Strasbourg, argumentond che la Svizra na fetschia betg avunda cunter la crisa climatica. Ed il tribunal ha dà raschun a las senioras! Tenor la chombra gronda (l'instanza la pli auta dal tribunal), è la Svizra en retard cun sias mesiras per cumbatter la midada dal clima, e quai haja consequenzas negativas per la vita da sia populaziun. La Svizra cuntrafetschia uschia a la convenziun dals dretgs umans suttascritta il 1974. Ch'il pli aut tribunal europeic sentenziescha la Svizra e pretenda dad ella d'agir pli svelt e pli rigurusamain en favur dal clima, quai è in cas da precedenza: igl è l'emprima giada che la protecziun dal clima vegn declarada sco dretg uman.